Hola Diego, ’a nuttata nun passa, hai voglia e ffa,
Napule palleggia cu nu dulore ca non si pò capi’
e nun tene scuorno ‘e sta fame ‘e chiànti senza età,
n’ata vota ferita a morte e n’ata vota s’adda sceta’.
E se sceta, ogni matina, p’ ’a campata e non p’ ’a gloria,
pe’ chella ci stive tu, ca levavi ‘e paccheri da faccia,
doppo na semmana ‘e muorzi e male panza,
cu na finta ca ‘ncatastava ‘a realtà arresecata, na scialata ‘e speranza.
Hola Diego, dimani, ‘o sapimmo bbuono, sarrà ‘a vita ‘e sempe
na iucata ‘e tombola ca sciorta che scummiglia ’e cartelle.
E mmiezo a sta paranza ’e numeri, Napule
se stuta e s’appiccia, fraveca e sfraveca, s’ ’ntosseca e s’arrevota,
e quanno sente l’anema ‘nterra, spanne na salvezza,
nu numero astipato, ‘o dieci, che all’intrasatta ‘a fa arripiglia’
pecché è n’ammore ‘e maggio che nun è mai fernuto,
‘a voce e na mamma che s’è iuta arrepusa’.
Hola Diego, ti si pigliato ’a nuvola do Padreterno
ca t’ha strignuto pure ’a mano, ’o sole è nu pallone,
e cumpagne s’ ’mparano a pazzia’ cu ‘o viento,
’o ciel ’e Margellina è l’area ‘e rigore,
’o Vesuvio fa a porta e nui ’e spettatori.
Hola Diego, nun pò mai ferni’ n’ommo ‘e ddio
nu poeta ca cummanava ‘o core,
ca pe’ sinistro teneva nu sciore
dint ’e capilli l’oro d’ ’e scugnizzi
E dint ’a ll’uocchie na guerra ’e culori.
Hola Diego, vaco a fatica’,
cchiù sulo ’e primma
ma cchiù napulitano ’e ieri.